لن يمر الأمر بهذه السهولة ............
يجب إيقاف اللاعب لمدة عام ..............
نطالب بتعويض 5 مليون جنيه ..............
نطالب بحرمان الأهلى من التعاقد مع لاعبين جدد لمدة موسمين ..........
كان هذا لسان حال الزمالكوية قبل أن تصدر لجنة شئون اللاعبين قرارها بصحة عقد إينو مع الأهلى و غرامة على إينو لمصلحة الزمالك
و لكن الزمالك ما عجبهوش القرار كالعادة و وصف لجنة شئون اللاعبين و إتحاد الكورة إنهم متحيزين للأهلى كالعادة ....و بعدين قرروا رفع الأمر للفيفا و خرجت علينا مواقع الزمالك بالعناوين الجبارة دى ...
ليس إينو و لكنها هيبة الزمالك ...........
محامى إيطالى للدفاع عن الزمالك فى قضية إينو لدى الفيفا ......
الزمالك لديه كل المستندات التى تدين إينو ..........
المحامى الإيطالى حضر إلى القاهرة و تسلم أوراق القضية و هو الآن فى طريقه للفيفا .........
وفجأة ......... إنقطعت أخبار المحامى الإيطالى !!! و وحدة وحدة الموضوع إبتدى يتنسى !!! و الأهلى قدم إينو فى مؤتمر صحفى و هو لابس الفانلة الحمرا رقم 15 !!!!
سألت نفسى ؟؟؟ يا جدعان هو إيه اللى حصل ؟؟؟ هو المحامى إتخطف و لا إيه ؟؟؟
كل يوم أفتح مواقع الزمالك على النت عشان أقرا خبر رفع القضية للفيفا لكن ولا حس و لا خبر !!! أفتح الجرايد يمكن ألاقى حاجة مكتوبة عن الموضوع و لو حتى متفبركة لكن بردو لا حس و لا خبر !!!
يكونش الـCIA الأهلاوى خطف المحامى و عمله غسيل مخ - زى ما عمل لإينو - ؟؟؟ بس ده خواجة يا ناس و صعب يتعملو غسيل مخ فى مصر !!!
أنا كنت مرة قريت على موقع zamalek.tv إن المحامى الإيطالى فعلا جه و جابولوا صور مع الشاب الأنيق الكتكوت أحمد توفيق حافظ و آل إيه عملوا معاه حوار !!! و بيقول فى الحوار ده إنه متابع أخبار الزمالك من خلال الموقع و كمان بيقرا تعليقات الزمالكوية على المنتدى !!! يمكن المحامى بيعرف يقرا عربى ؟؟ جايز بردو .... لكن هيسيب ميلانو و يوفنتوس و الناس اللى سابقانا فى الكورة دى بيجى 64 سنة و هيتابع أخبار الزمالك إللى مستواه لا يصلح درجة تانية فى إيطاليا ؟؟ طب إزاى ؟؟
و ضحكت من قلبى لما قريت إن المحامى أخد معاه كمان أوراق قضية حسنى عبد ربه ....... يا سبحان الله طب مش ده محامى الزمالك ؟؟؟ و حسنى دلوقتى قضيته بين الإسماعيلى و ستراسبورج ؟؟؟ طب إيه بقا اللى حشرو فى النص و لا هى تلاكيك و خلاص ؟؟؟
بينى و بينكم أنا قلقت و خفت و قلت ده كدا الفيفا هيوقف الأهلى عن اللعب و الزمالك هياخد راحته فى اللعب يمكن يكسب بطولة و لا حاجة ..... لكن مرت الأيام و لا حس و لا خبر
و دلوقتى نفسى أى مسئول زمالكاوى يطلع و يقول ليه الزمالك لحد دلوقتى لم يصعد موضوع إينو للفيفا ؟؟؟ بقا بعد كل الدوشة دى و رفضكم قرار لجنة شئون اللاعبين و إتهامكم لإتحاد الكورة بالتواطؤ مع الأهلى !!! بعد كل ده يموت الموضوع و لا حس و لا خبر
القضية دى بتثبت إن الأهلى فعلا نادى عظيم و أكثر نادى محترف و لديه إدارة واعية ......
فاكرين قضية إسلام الشاطر ..... بردو قعدوا يلفوا و يدوروا و يقولوا العقد مع الأهلى باطل و الشاطر من حق الزمالك و لما يرجع الشاطر للزمالك مش هنلعبه كورة و هنزله ........ لكن إيه اللى حصل ؟؟؟ إسلام الشاطر بقاله موسمين و نصف بيلعب فى الأهلى كأحسن ما يكون ... و غيرها و غيرها من القضايا اللى الأهلى إتعامل بإحترافية مع الموضوع
ياريت أسمع صوت واحد زمالكاوى يرد عليا و يقول ..... هو ملف قضية إينو راح فيييييييييييييين ؟؟؟؟؟؟