عاجبكم كده............ الأهلي اتغلب

خسر الأهلي 1 / 2 أمام بلاتنيوم في لقاء الذهاب لدوري رابطة الأبطال الأفريقي في اللقاء الذي جمع بيم الطرفين بجنوب أفريقيا ..

تقدم فريق بلاتنيوم بهدف في الدقيقة 11 من الشوط الثاني تعادل الأهلي عن طريق عماد متعب في الدقيقة 40 من نفس الشوط ثم تقدم بلاتنيوم مرة أخري في الدقيقة الأخيرة من زمن المباراة ..

تشكيل الفريق :

يضم التشكيل كل من : أمير عبد الحميد و شادي محمد و احمد السيد و محمد سمير و إسلام الشاطر و جيلبرتو و أنيس بو جلبان و حسام عاشور و محمد بركات و أبو تريكة و فلافيو .. و في الشوط الثاني يلعب عماد متعب بدلا من إسلام الشاطر و رضا الويشى بدلا من فلافيو

الشوط الأول

بدأ الشوط الأول من مباراة الأهلي و بلاتنيوم بفترة جس نبض انحصر اللعب في منتصف الملعب و فى الدقيقة 15 ضربة حرة مباشرة لصالح الأهلي تلعب عرضية على رأس فلافيو يبعدها دفاع بلاتنيوم .. و يشارك بركات في الدفاع و يبعد الكرة إلى ضربة ركنية ..

في الدقيقة 21 ينقذ جيلبرتو مرماه من هدف مؤكد من ضربة ركنية يلعبها مهاجم بلاتنيوم نحو المرمي لكن جيلبرتو يبعدها في الوقت المناسب .. و في الدقيقة 22 يسدد ادوارد وليمز كرة قوية تمر بجوار القائم .. و يحاول الأهلي السيطرة على منتصف الملعب بتحركات مختلفة من بركات و أنيس بو جلبان و حسام عاشور ..

في الدقيقة 25 يحصل بركات على ضربة حرة مباشرة من تفاعل دفاعات بلاتنيوم بخشونة معه و يعود الأهلي للتحضير من منطقة الدفاع .. في الدقيقة 31 ضربة حرة مباشرة لصالح بلاتنيوم تلعب عرضية يطلع أمير عبد الحميد من اعلي نقطة و يلتقط الكرة بثبات ..

في الدقيقة 36 يقود أبو تريكة هجمة من منتصف الملعب و هات و خد مع فلافيو ثم تمريره لجيلبرتو و عرضية ترتد إلى إسلام الشاطر يلعب الكرة في يد حارس بلاتنيوم .. في الدقيقة 37 ترتد الكرة هجمة لصالح بلاتنيوم و تسديدة يمسكها أمير عبد الحميد .. و بعدها بثلاث دقائق هجمة أخري لصالح بلاتنيوم تنتهي الكرة بضربة ركنية يبعدها أمير عبد الحميد ..

و في الوقت بدل الضائع يلعب ليودى كرة تمر عرضية تمر من فوق العارضة لينتهي بعدها الشوط الأول بالتعادل السلبي بدون أهداف ..

الشوط الثاني

مع بداية الشوط الثاني يجري الأهلي تغييره الأول بنزول عماد متعب بدلا من إسلام الشاطر و يلعب محمد بركات في الناحية اليمني .. و في الدقيقة 7 هجمة لفريق بلاتنيوم تنتهي بتسديدها يبعدها أمير عبد الحميد بقبضة يده .. في الدقيقة التاسعة يظهر الشغل الهجومي الأهلاوي بهجمة منظمة عن طريق الثلاثي متعب و فلافيو و أبو تريكة يسدد الأخير كرة قوية فوق العارضة ..

و في الدقيقة 11 يتقدم بلاتنيوم بهدف عن طريق اللاعب موما تونجا من انفراد بالحارس أمير عبد الحميد بعد الهدف يسعى الأهلي لإدراك التعادل .. و في الدقيقة يلعب أبو تريكة كرة رائعة تصطدم في القائم و تخرج إلى ضربة مرمي .. و بعدها فرصة أخري لصالح فلافيو يبعدها الدفاع ..

و في الدقيقة 22 يجري الأهلي تغييره الثاني بنزول رضا الويشي بدلا من فلافيو و في الدقيقة 25 هجمة منظمة للأهلي بدأت عن طريق رضا الويشى في الناحية اليسرى و تنتهي بتسديدة فوق العارضة بكثير عن أنيس بو جلبان و في الدقيقة 32 خشونة زائدة من اللاعب جوزيف ميلكا ضد أحمد السيد و يحصل اللاعب مع كارت أصفر ..

في الدقيقة 35 ينقذ أمير عبد الحميد تسديدة قوية و يبعدها إلى ضربة ركنية .. و في الدقيقة 36 ينطلق جيلبرتو بالكرة من الناحية اليسرى و يلعب عرضية اقتنصها عماد متعب و سجل منها هدف التعادل للأهلي .. و في الدقيقة 41 إنذار لرضا الويشى للخشونة ..

و في الدقيقة الأخيرة من الشوط الثاني هجمة لصالح الأهلي يبعدها حارس بلاتنيوم بهجمة مرتدة ينقض عليها مهاجم بلاتنيوم و يضع منها انفراد لزميلة الذي يسجل الهدف الثاني لفريقه .. و بعدها بقليل يطلق الحكم صافرة نهاية المباراة بفوز بلاتنيوم 2 / 1 ..

يعجبنا اذاى ده لا يعجب لا حى ولا ميت(حلو المثل ده متهيالى مافيش اكتر من كده علشان الناس تحس باللى احنا فيه)شكرا ام سيوفه على اعادة احداث المباراه ههههههههه علشان اللى ماشفهوش يلا علشان تبقى عكننه جماعيه

جوزيه السبب نازل بمهاجم واحد مع ان فريق جنوب افريقيا كان نازل خايف من الأهلى... و لما نزل متعب طلع فلافيو و حرق دمنا بالويشي......و ثلاثي خط الدفاع شادى و سمير و احمد السيد كانوا سيئين لأقصى درجة و كانوا فى منتهى السذاجة.......بالرغم من ده كله النتيجة مش سيئة و الأهلى فرصته كبيرة فى ماتش العودة إن شاء الله

شكرا يادكتور(تحليل)سليم و(تشريح)هايل (للحاله)الغريبه اللى كان عليها الفريق النهارده

انا مش عارف جوزية عاوز اية بالظبط رايح يكسب ولا يدافع ولا يعمل اية بالظبط ؟؟؟؟

خدوا بالكم من حاجه يا اخوانا ده فريق مجهول بالنسبه للقاره و الحذر واجب لحد ما جوزيه يقراه و فعلا فى الشوط التانى طلع مدافع و نزل عماد و شكل الفريق ابتدى يبقى معقول بس الاخطاء الدفاعيه القاتله و البطئ الشديد (يمكن بسبب الحراره و الرطوبه لان الاهلى مش متعود يلعب الضهر و لو تفتكروا ده كان حاله فى ماتش الترسانه و بيتروجيت فى مصر) طب جوزيه يعمل ايه لشادى اللى رجع يمارس هواية القفز لاسفل و يسيب المهاجم يستخلص منه الكوره بسهوله غريبه و لا السيد اللى كان متوتر من غير داعى و انا لو من الحكم كنت على الاقل اديته انذار و لا عاشور اللى فجأه نسى الكوره فعلا اللاعبين ضيعوا فوز أو على الاقل تعادل كان فى ايديهم و انا مع الدكتور مراد فى ان النتيجه مش سيئه ان شاء الله مع قتال لاعبى الاهلى المعروف عنهم و اراحتهم كفايه قبل الماتش و اعدادهم كما يجب

مشكوره ام سيف للاعاده الجيده للمباراه

وقدر الله وما شاء فعل وان شاء الله الاهلىيفوز هنا فمصر ويؤدى مباراه جميله

جزيتى كل الخير اختى

عنوان الموضوع حسسني بالذنب كاني انا السبب في هزيمة الاهلي
وفكرني بوالدتي لانها دايما على قناعة اني السبب في اي مشكلة تحصل
لدرجة اني ابتديت اشك اني السبب في القضية الفلسطينية ومشكلة كشمير وارتفاع اسعار الحديد
وبالنسبة للماتش احنا فعلا على الاقل ضيعنا التعادل الايجابي وخرجنا بهزيمة بلا داعي
بس نتيجة مش وحشة يعني اتنين واحد ارحم من اتنين صفر او واحد صفر
يعني جون واحد كفاية للتاهل في القاهرة بس التركيز مهم والهدوء كمان
وفرصة اننا خلصنا الدوري عشان نركز للماتش دة خلينا نخلص ونطلع دور التمانية
ونرتب اوراقنا المبعثرة دي ونشوف مين هيجي ومين هيرجع ومين هيمشي
ومشكورة اختنا العزيزة للموضوع وللعنوان وانا اعلن عدم مسؤليتي عن الهزيمة دي
واللي يشوف والدتي يقولها اني ماليش دعوة خالص

atilla كتب:: عنوان الموضوع حسسني بالذنب كاني انا السبب في هزيمة الاهلي
وفكرني بوالدتي لانها دايما على قناعة اني السبب في اي مشكلة تحصل
لدرجة اني ابتديت اشك اني السبب في القضية الفلسطينية ومشكلة كشمير وارتفاع اسعار الحديد
وبالنسبة للماتش احنا فعلا على الاقل ضيعنا التعادل الايجابي وخرجنا بهزيمة بلا داعي
بس نتيجة مش وحشة يعني اتنين واحد ارحم من اتنين صفر او واحد صفر
يعني جون واحد كفاية للتاهل في القاهرة بس التركيز مهم والهدوء كمان
وفرصة اننا خلصنا الدوري عشان نركز للماتش دة خلينا نخلص ونطلع دور التمانية
ونرتب اوراقنا المبعثرة دي ونشوف مين هيجي ومين هيرجع ومين هيمشي
ومشكورة اختنا العزيزة للموضوع وللعنوان وانا اعلن عدم مسؤليتي عن الهزيمة دي
واللي يشوف والدتي يقولها اني ماليش دعوة خالص

ياسلام هتهرب من المسئولية يا مناضل مين تطوع وقال لادارة الاهلي الفريق مسئوليتي في حنوب افريقيا دانا لي فيها مناضلين اصحابي من ايام مانديلا مش انت وطبعا اصحابك قاموا بالواجب واخدوا الفريق لمطعم الله اعلم شكله ايه خللى شادي متلخبط طول الماتش والرجل معزور كان محتاج الحمام عشان كدا كل شوية ينط لفوق
كل دا ومش انت السبب. ...اعجبني جدا رد حازم ..بس صراحة المباراة قلقتني على مستوى الاهلي جدا
تحياتي ام سيوفه على المتابعة

اهلا اهلا ياعم وائل انت شكلك من نفس الحزب بتاع والدتي
ومش عارف انا هبقى مسئول عن اية كمان المهم محدش يتهمني بثقب طبقة الاوزون

والله يا اتيلا والدتك ادري بيك
وطالما ده رأيها فأكيد عندها مبررات كافية وما نقدرش نراجعها في الكلام
أنا قلقانة جدااااااااا من ماتش العودة
مهم جدااااا ان ما يجيش فينا جون وطبعا بحالة الدفاع ربنا يستر
من الماتشات القليلة اللي بأحس ان جوزية بدأ الماتش من غير ما يقرر هو عايز ايه
يعني مش طريقة فريق عاوز يكسب
لكن برضه مش طريقة فريق بيلعب علي التعادل
طيب لما اتعادلنا وفاضل ربع ساعة علي نهاية الماتش مش عارفين نركز فيهم ونطلع بالنتيجة دي
تفتكروا جوزية عنده الويشي أحسن من بلال
أمير مهزوز جدا ونص الملعب بقي نقطة ضعف ثاني بعدم وجود فتحي

انا محروق دم اهلي

تحياتى لكم لكن يا أخ أتيلا أنا شفتك و أنت بتخرم الأوزون يبقى إزاى مش أنت المسئول عن ثقب الأوزون (قر إعترف مافيش فايدة من الإنكار) أما بالنسبة للأخت روبوس للأسف بعد هدف التعادل كان باقى أقل من 8 دقائق مش ربع ساعة و الهدف الثانى جاء فى الدقيقة 90 (شفتى حرقة الدم الحقيقية..........و بالنسبة للويشي أنا كنت فرحان لما بأسمع إنه ماشى من الأهلى فى صفقة تبادلية مع أندية أخرى لكن للأسف طلع مقيد إفريقياً كمان!! ربنا يسهل و يمشى حتى لو مافيش حد هيجي بدل منه........جوزيه فى الماتش ده عمل زى مباراة الإسماعيلى فى القاهرة الموسم الماضى لما إنهزمنا 3-0 هو السبب بنسبة 100%) و تحياتي للأخ وائل

ROBOS كتب:: والله يا اتيلا والدتك ادري بيك
وطالما ده رأيها فأكيد عندها مبررات كافية وما نقدرش نراجعها في الكلام
أنا قلقانة جدااااااااا من ماتش العودة
مهم جدااااا ان ما يجيش فينا جون وطبعا بحالة الدفاع ربنا يستر
من الماتشات القليلة اللي بأحس ان جوزية بدأ الماتش من غير ما يقرر هو عايز ايه
يعني مش طريقة فريق عاوز يكسب
لكن برضه مش طريقة فريق بيلعب علي التعادل
طيب لما اتعادلنا وفاضل ربع ساعة علي نهاية الماتش مش عارفين نركز فيهم ونطلع بالنتيجة دي
تفتكروا جوزية عنده الويشي أحسن من بلال
أمير مهزوز جدا ونص الملعب بقي نقطة ضعف ثاني بعدم وجود فتحي

الموضوع ببساطة ان طريقة تفكيري ومعالجتي للامور مختلفة جدا عن ما هي بتشوف في محيطنا العائلي

دة طبعا غير أرائي الغريبة في أمور كتيرة والمعادلة عندها بسيطة:

مادمت مختلف وارائي مختلفة يبقى لما الامور تكون مختلفة يبقى اكيد انا السبب هو دة كل الموضوع

وبالنسبة لماتش العودة انا مش شايف ان في سبب للقلق خالص

الحكاية هتكون محتاجة تركيز مش اكتر

وعلى ما اظن ان شادي مصاب وبيلعب وهو مش في حالته

وكمان خط النص مش بيساند واظن ان في اصابات برضة

دة طبعا غير اصابة امير

وحاسس ان الاهلي بيلعب بنص قدراته للاصابات دي كلها

وربنا يسهل انشاء الله ونوصل وبعدها نرتب حالنا كويس

Dr Mourad كتب:: تحياتى لكم لكن يا أخ أتيلا أنا شفتك و أنت بتخرم الأوزون يبقى إزاى مش أنت المسئول عن ثقب الأوزون (قر إعترف مافيش فايدة من الإنكار) أما بالنسبة للأخت روبوس للأسف بعد هدف التعادل كان باقى أقل من 8 دقائق مش ربع ساعة و الهدف الثانى جاء فى الدقيقة 90 (شفتى حرقة الدم الحقيقية..........و بالنسبة للويشي أنا كنت فرحان لما بأسمع إنه ماشى من الأهلى فى صفقة تبادلية مع أندية أخرى لكن للأسف طلع مقيد إفريقياً كمان!! ربنا يسهل و يمشى حتى لو مافيش حد هيجي بدل منه........جوزيه فى الماتش ده عمل زى مباراة الإسماعيلى فى القاهرة الموسم الماضى لما إنهزمنا 3-0 هو السبب بنسبة 100%) و تحياتي للأخ وائل

ماشي يادكتور مش هنفي كلامك مادمت شفتني يبقى خلاص
بس استفسار بسيط حضرتك كنت فوق كدة بتعمل اية
انا وواضح اني كنت بخرم الاوزون وحضرتك كنت بتعمل اية

لا انا ماكنتش فوق بس انا لى كاميرات مراقبة بتراقب كل أرجاء مجرتنا الموقرة

مانويل جوزيه يتحمل المسئولية كاملة
و زى ما بنصقفله لما بيكسب و بنقول عليه عبقرى لازم برده نقف و نقوله أخطاءه لما يخطئ
جوزيه أخطأ فى التشكيل لما لعب بمهاجم واحد
أخطأ لما لعب بشادى محمد ليبرو مع إنه كان ممكن يلعب بمحمد سمير ليبرو و يخللى خسام عاشور (السئ) يميل مع الدفاع عشان يساعدهم شوية
أخطأ لما فشل إنه يجهز اللاعبين نفسياً للقاء و عطاهم إحساس إن المباراه سهلة من قبل ما تبدأ
بالنسبة لنقطة رضا الويشى !! يمكن دوره مكنش واضح فى اللقاء بس اللى يركز فى الهدف هيلاقى إن الويشى بتحركاته خلق مساحة لجيلبرتو و مررله الكرة و رفعها و هو مرتاح جداً و كان الهدف الجميل
و أنا شايف ان الويشى افضل من بلال و اسامة حسنى بس محتاج مشاركات كتير و تدريب

هو المشلول عاشور كان بيلعب امبارح
مسمعتش

علي فكرة ده اضعف فريق من 16 الموجودين وعيب كده يا اهلي ارجوع اعتزال اير واعطاء الفرصة كاملة لاحمد عادل وشكرا والاهلي فعلا في خطر

شكرا للمرور
نبيل
طاطا
أدمين
دكتور مراد
أتيلا
رباب
نونا
حازم
مروان
كوجاك
وائل

أما أنا رأي ان الخوف مش من المباراه القادمه في القاهره الخوف من مستوي الأهلي اللي في النازل
ومحدش يقول المصابين لأن ابو تريكه وبركات وشادي وأحمد السيد مثلا مستواهم في النازل من سئ لأسوء
يعني بصراحه مش دي الفرقه اللي توصل لنهائي افريقيا
لازم يتعدلو ويجي شويه لعيبه جداد وصغيرين يكون نفسهم يحققوا حاجه جديده

كان بيركبلة جلدة يعني خارم الاوزون وكمان بتتكلم

tamer33 كتب:: كان بيركبلة جلدة يعني خارم الاوزون وكمان بتتكلم

لو الكلام دة موجه ليا فانا اقولك اني اتكلم براحتي عشان اللي يخرم الاوزون يتكلم زي ما يحب
ونورت طبقات الغلاف الجوي ياعمنا

كان بيركب جلدة يعني انت خارم الاوزون وكمان بتتكلم انت خالص

يا جماعة حرااام اللى بيحصل دا الأهلى مستواه فى النازل ومش عارفين نكسب بقالنا كام ماتش.. دا الزمالك اللى اسمه الزمالك بقاله كام ماتش بيلعب كويس وبيكسب.. مش معقوله كدة الأهلى اه بيمر بظروف صعبة وفيه اصابات كتير بس الحاجات دى مش المفروض تأثر على فريق كبير ببيلعب فى اكتر من بطولة..تانى حاجة لازم الأهلى يدعم الدفاع بتاعة شوية والموضوع دا كان المفروض يحصل من السنة اللى فاتت ..لأ دول سابو وائل جمعة واحمد السيد كان مصاب وعماد اتصاب ومبقاش في الا اتنين مدافعين وواحد ناشىء لسة ماعندوش أى خبرة.. طبعا لازم اداء الدفاع يبقى زى الزفت..شوفو مدافعين اتعاقدو معاهم بدل المهاجمين والناحية اليمين اللى خلاص بقو كاملين العدد حرااااام كدة

» الأهلي يعود بتعادل إيجابي اقترب الأهلي من بلوغ دور الثمانية من دوري أبطال إ
» الأهلي يطرح حصة من تذاكر المباراة لجماهير الأهلي بالأسكندرية وسط مراقبة مشددة
» صحيفة: الأهلي يرضخ لأوامر جوزيه بسبب قناة الأهلي
» كاجودا : الأهلي يفاوضني لخلافة جوزيه ! .. فينجادا : سأكون سعيدا بقيادة الأهلي !
» مستشار الأهلي: غرامة الكلب قليلة ولا توازي الأضرار التي تعرض لها الأهلي