اجزاء من حديث شادي المشكله

*مفيش شك شرف كبير لاى لاعب يحقق الانجازات دى و الحمد لله الناس اتعرفت عليا من خلال النادى الاهلى وعرفت اسم شادى محمد ودى حاجة مقدرش انساها ابدا والنادى الاهلى ليه فضل كبير جدا عليا وساهم انى اعمل انجازات كتير اسم النادى الاهلى بلاعيبته الموجودة بمدربينه اللى دربوه خلال 11 سنة ،، واكيد انا فخور جدا بكل يوم قعدته فى النادى الاهلى وبكل يوم حققت فيه انجاز ودى حاجة انا اتشرف بيها وفخور بيها جدا

*

بوبو اهلاوى لو الاهلى احتاجك هاترجع تانى ولا خلاص قفلت صفحه الاهلى؟؟؟ 

لا صعب .. الناس بتقول كدة لانها مش لاقية مبرر شادى يبقى خارج الاهلى .. انا بقولهم تاكدوا تماما ان حصلت حاجات مش طبيعية الحاجات دى انا خارج الاهلى بسببها ايه هى .. انا قولت مش هعلنها مليون مرة .. هحتفظ بيها لنفسى لانى محبش ان جمهور الاهلى يسمع اى حاجة مش كويسة على ناديه ..

*

اولا رحيلى من الاهلى مالوش علاقة بخلافى مع جوزيه .. فى لاعيبة كتير بتخاف تتكلم ومش اصحاب قرار .. ولكن اللى بقولهولك دة انا مسئول عنه جدا .. جوزيه اخر سنة كان بيتعامل مع كل اللعيبة باسلوب مش حلو .. الطبيعى انى ليا رد فعل .. يعنى ايه مثلا لما ينزل الفرقة كلها تسلم وكابتن الفرقة ماينزلش .. فدة سلوك مش حضارى خالص .. دة سلوك حد متغطرس ومغرور ومتكبر ..

- يا كابتن حضرتك عارف ان مانويل جوزيه فى منزلة خاصة عند كل جمهور الاهلى ..

هو لوحده .. ؟؟ انا هسألك سؤال انا كانت بطولاتى جوا النادى الاهلى قبل جوزيه ..

- مع حضرتك ولكن هو مازال قيمة كبيرة عند الجمهور

وشادى محمد قيمة كبيرة برضه .. جوزيه قعد فى الاهلى 6 سنين انا قعدت 12 سنة ..

- طبعا يا كابتن .. ولكن اللى اقصده ان هجوم حضرتك عليه ممكن يفقدك بعد تعاطف الاهلاوية ..

لو هيقل تعاطفهم على حساب كرامتى .. انا مش عايز تعاطف .. وهكلمك بصراحة .. يعنى لما يقول النادى الاهلى مش هيكسب من غيرى واسالى كل اللعيبة اللى تواجدوا فى الاوضة ساعتها .. لما يقول هقعد اتابعكوا وانتوا فى انجولا واتفرج .. عليكوا وانتوا بتخسروا ..

- ممكن يكون الكلام دة فى لحظة غضب فقط ..

واشمعنا بنشوفله أعذار عشان نقولها دلوقتى .. المدرب اللى سلوكه محترم بيبقى محترم على طول .. اللى سلوكه بيتغير ماتقدريش تديله الامان .. لانه اولا واخيرا مش معاه باسبور مصرى ومش قاعد فى مصر .. حتى لو انتمى للبلد .. هو كان بيلعب على وتر الجماهير .. ازاى بيقول كدة وبعدين شتم فى اللعيبة .. والحوار اللى عمله بعد ما طلعت من الاهلى بعشر ايام اكبر دليل .. شتم فى مصر ووو … هل تقبلى ذلك .. ؟؟

- لا طبعا و لكن هل هو شتم .. هو فقط انتقد ..

الصحفيين كلهم انتقدوه وكان رايهم انه شتم فينا ..

*ماذا حدث فى انجولا ؟

- جوزيه تحامل عليا جدا ولكن انا قولت بلاش اتكلم كتير لان فى لعيبة وانا كابتن الفرقة .. فمينفعش يصدر منى اى حاجة مش مظبوطة .. ولكن سلوك اسلوب كلامه عيب ان الواحد يقوله فسكتت برضه .. بعدها فى الاستراحة فوجئت انه بيعنفنى انا فقط .. فقولتله ليه مش بتكلم حد غيرى .. كابتن الفريق دة ليه احترامه فى كل مكان .. فايه السر انك بتعمل كدة .. فابتدى يتكلم باسلوب مش حلو خالص .. واستحملت وسكتت .. فابتدى يقولى انا عندى فلان وفلان وفلان ووو .. قولتله انا كابتن الفريق .. لما انت عندك كل دول بتلعبنى انا ليه كل السنين دى .. فسكت .. وبعدين ابتدى الكلام التانى .. من نوعية مش هتكسبوا من غيرى .. انتوا المصريين كدة عقلياتكوا كدة وتفكيركوا كدة .. لذلك انا صدقت حواره بعد ما مشى لان الكلام مش اول مرة يقوله .. قاله فى الاوضة لينا قبل كدة .. لما انت مش عاجبك المصريين قاعد معاهم ليه .. المصريين مقعدينك فى احسن فندق بيعاملوك احسن معاملة .. طلبوا انك تاخد الجنسية .. جمهور الاهلى كان شايله على كتافه .. وهو كان بيضحك عليهم بتيشرتات ويحدفها عليهم والناس فى مصر بتتعامل بالعاطفة .. فانا حزين ان حد يتلاعب بينا بس .. لانى انا التاريخ اللى عملته فى الاهلى ولا جوزيه ولا غيره حد يقدر يلغيه .. انا متعاملتش مع جوزيه بس .. تعاملت مع 5 او 6 مدربين اجانب وحافظهم كلهم وحافظ تفكيرهم .. لكن انا ماقبلش على نفسى حد يهيننى ولا يهين زمايلى ولا يهين حد من بلدى ..

وانا اقسملك بالله ما قولت ربع الكلام اللى هو قاله .. لكن انا بقول الحقيقة اللى حصلت .. الناس عارفة ان انا مابكدبش ..

- هل علاقة حضرتك مع جوزيه بعد كدة اتحسنت والموقف انتهى .. ؟؟

- ولا اعرفه .. اتمسح من ذاكرتى .. انا كل واحد صغير جوا الاهلى اتدربت معاهم بحترمه مدربينى كلهم وبحبهم ومن اول اصغر ناشىء طلع معايا واتمرنت معاه بحترمه وبقدره .. لكن الا الراجل دة لانى بحب اللى يحترم المكان ويقدره .. واقسملك بالله .. لما مضى فى انجولا واعلنت قبل ماتش الحرس الناس نسيت الموقف دة عشان كسبنا .. لكن دة مش موقف واحد بطل .. مش موقف واحد دى تبقى نهايته بعد اللى النادى الاهلى عملهوله .. لو خسرنا كانت الناس هتتكلم .. لكن احنا كسبنا بمجهود اللعيبة هو مركزش فى الدورى دة اللى تعبوا فيه اللعيبة والجماهير بمجلس الادارة والمساعدين اللى معاه .. هو كان دوره هدام جدا ومايقولش كدة الا اللعيبة الجريئة جوا الفرقة ..

*كلمنا عن علاقتك مع مانويل جوزيه ؟ وهل كان دائم التعامل معك بطريقة فظة أم أنه إتخذ معك ذلك الإسلوب فى الفترة الأخيرة فقط ؟

لا .. اخر سنة بس .. كان دائم الهجوم على المصريين .. وكان ليه كلمة شهيرة .. العشر دقايق المصرية .. لما تدى حد ميعاد يجيلك بعد ساعتين ..

- ما دى حقيقة ..

- ماهم فى البرتغال شحاتين .. لولا الاتحاد الاوروبى لما دخل غير من البرتغال .. المفروض مايقولش كدة على بلد عايش فيها ..

- مشكلة الاجانب انهم صرحاء اكتر من الازم .. 

- الكلام دة كدب ومش حقيقى هو عارف عادات وتقاليد المصريين كويس .. 

- لكن هو كان بيحب مصر ومعترف بفضلها .. 

- لا المفروض كان يعترف ان الاهلى عمل اسمه .. وانه جه هنا مغمور والاهلى كبره .. زى اى مدرب ما بيعترف بكدة ..

- ليه حضرتك ماقولتش رايك فى جوزيه صراحة قبل ما يمشى على مدى السنين اللى فاتت .. 

- مكنش بيظهر السلوك دة خالص .. انا هقول حاجة واتحدى ان حد يقدر يطلع يقولها .. مرة جه بلبس خروج وقال انا هسيبكوا وهمشى .. انا مش همرنكوا .. فاستغربنا جدا من اللى حصل دة .. وليه بيعمل كدة .. السلوك دة شوفناه اخر سنة فقط .. قبلها معملش كدة خالص .. انا ماقدرش اتحمل حد يهيننى واسكت ..

*كيف تقيم جوزيه كمدرب ؟

مدرب كويس جدا .. والنادى الاهلى اضاف ليه كتير وهو اضاف للاهلى كتير ولكن على اخر سنة كان الغرور تملك منه جدا وسلوكياته كانت متغيرة جدا .. دة فقط اعتراضى .. انا ماتكلمتش عن الخمس سنين اللى فاتت .. لكن انا اخدت موقف فى اخر سنة بس لكن قبل كدة كان كويس معايا جدا ومع كل الفرقة وكان احيانا بيبقى فى مشاكل مع بعض اللعيبة ..

وهثبتلكوا ان كلامى مظبوط ..

دلوقتى الحضرى مشى خلاص وشاف طريقه فى مكان تانى شوفتى اتكلم على الحضرى باسلوب وحش ازاى .. ؟؟ 

بس قياسا باللى عمله اللى الحضرى يستاهل اللى جوزيه قاله ..

مالهوش فيه .. طيب ما جوزيه هرب برضه .. مضى فى انجولا وهو مع الاهلى ..

*هل انت فعلا طلبت الرحيل أم استغناء ؟

اول مرة اعلنها بصراحة يعنى .. لعبة قذرة ضدى .. عشان كدة انا صممت امشى .. 

فى تفاصيل اكتر .. ؟

لا ماينفعش .. 

*بعد رحيل جوزيه لماذا لم يتراجع عن قراره و يطلب البقاء و الكل بالتأكيد سوف يوافق ؟

لالا .. فى حاجات اكبر من اللى انا بقوله ماينفعش انها تتقال .. الموضوع كان عايز قرار منى لازم اخده فورا ..

*مين اللاعب اللى تخلى عنك فى أزمتك بعد رحيلك من الأهلى ولم يسأل عليك ؟

ماتعديش .. بس انا عارف انتماءهم للاهلى بسيط فمش فارقة يتصلوا بيا او لا .. لكن اللعيبة اللى بتحب النادى بجد وبتحب شادى بجد لحد انهاردة بيتطمنوا عليا باستمرار ..

*

ما هي حقيقة وجود خلاف بينك وبين النادي الاهلي علي مستحقاتك الماليه ؟

انا صرحت قبل كدة انى لو ليا 10 مليون جنيه عند النادى الاهلى مستحيل تبقى مشكلة ولا هطلبهم لان الاهلى عمره ما بياكل حاجة على حد والاهلى سباق انه يدى لاعيبته فلوسها ..

*

كابتن شادى لماذا لم تتنازل عن الشارة لمحمد ابوتريكة ؟

لان انا كنت احق بيها ..

*

لما كنت بتلعب كنت بطمن لوجود امير وراك !!

مش هتكسف وهقولها بصراحة .. 80 % ..

*ما هى حدود علاقتك حاليا مع كل من :

حسن حمدي:اتبسطت جدا فى الانتخابات لما قابلنى .. لو سنة كمان كان ممكن دموعى تنزل .. اول ما شافنى اخدنى فى حضنه وقالى انت ابننا ولو محتاج اى حاجة كلمنى ..

الحضري:عشرة عمر انا وهو .. دخل بيتى ودخلت بيته فبحترم كل يوم قضيناه مع بعض .. وهظل احترمه ..

*

هل تغيرت معامله بعض لاعبى الاهلى لك بعد تركك الاهلى ؟؟ 

هى مجموعة بسيطة بس انا عارف انهم حاقدين وانا عارف شخصيتهم من قبل كدة يعنى ..

*

هل علاقتك بوائل جمعة اتأثرت بعد الكلام اللي اتقال من جوزيه ؟

معرفش جوزيه قال ايه .. 

ممكن يكون قارن بينكوا

ولو قارن بيننا مفيش مقارنة انا اقدم منه بسنوات كتير داخل الاهلى .. بدون غرور بس جوزيه لم يقارن بيننا .. وانا كنت الاساسى فى كل المباريات وكان فى سنة مجموعة من اللاعبين مش بتلعب باستمرار وانا كنت اساسى على طول .. بس انا اللى ضايقنى الاسلوب اللى تعامل بيه معايا .. مش معايا انا بس مع 5 او 6 لاعبين تحديدا .. واحيانا كان بيكلم ابو تريكة وحش على فكرة .. ابو تريكة ممكن ينكر .. عشان علاقته قوية بيه طول الوقت لكن اقسم بالله اوقات كان بيكلم ابو تريكة باسلوب وحش جدا ..

بس معروف ان جوزيه عصبى

عصبى او مش عصبى فى حاجة اسمها حدود الشغل .. ماتتعداش عليا .. فى حدود الشغل اه ممكن اسمعك .. لكن تتعدى عليا فى حاجات مش من حقك مش هسمعك طبعا .. انا بحترمك وبقدرك يبقى كابتن الفرقة تحترمه وتقدره .. دة عرف فى كل مكان .. برة كابتن الفرقة بيتدخل فى التشكيل والمدرب بيسأله وياخد رايه .. لكن يهينه لا .. مش هسمحله ولا اسمح لاى مخلوق ..

*

ما هى النصائح التى تقدمها لاحمد السيد كابتن الاهلى ؟

اقوله يلتزم الهدوء لانه قدوة لكل الفرقة ولازم يكون ليه شخصية على اللاعيبة .. ولو مش قادر يعمل كدة بنصحه انه مايبقاش كابتن للفرقة .. لكن كبتنة الفريق دى مش سهلة .. لازم تكون قائد للاعبين وليك شخصية على كل لاعب ..

*

فى حاجات كانت بتحصل فى غرفه خلع الملابس كانت بتوصل اول بأول للاعلام ياترى مين كان بيسربها ؟؟ 

ياريت بس تقولنا عشان نعرف مين هوا

هقول على سر اول مرة اعلنه ..

انا كنت عارف مين بس مقدرش اقول الاسامى .. لانه اكتر من واحد 

حد لسة موجود ولا مشى ؟؟

لا موجود 

ايه السر وراء مهاجمه موقع جماهير الاهلى el-ahly.com ليك عمال على بطال (حتى ازمه جوزيه اللى حصلت فى انجولا بعد ماتش سانتوس اتنقلت بعد الماتش بساعات على الموقع دا ::اكيد وراها اللى بيسرب اسرار الفرقه اللى سألتك عليه فى السؤال الاول)؟؟؟

دى حقيقة وانا كنت مركز معاه جدا ولكن كنت بعمل نفسى مش واخد بالى لانى مش بتابع مواقع فاشلة بالشكل دة .. اللى اعرفه ان موقع اسمه جماهير الاهلى .. يعنى حاجة محترمة يعنى كيان وحاجة تنتمى للاهلى يعنى فيها مبادىء واحترام .. هل ينفع موقع ينتمى للاهلى يطلع يهاجم كابتن الفريق اللى هو بيمثل الفريق وزيه زى الادارة بالظبط .. فدة معناه ان الموقع دة مأجور ..

وانا اعلم تماما ان بيروحلهم هدايا من مانويل جوزيه نفسه .. 

ولاول مرة فى حياتى اقول الكلام دة ..

واقسم بالله كان جوزيه بيبعتلهم هدايا وهما بيعتوله هدايا واول مرة اعلن دة واتمنى تكرريها .. 

موقع الاهلى دوت كوم تحديدا .. ؟؟

هعلنهالك اهو .. احمد حسن بيديهم هدايا .. الاتنين اللى بيكتبوا واحد اسمه احمد سعد وواحد تانى اصحاب وائل جمعة وامير عبد الحميد واصحاب احمد حسن بيديهم هدايا ومانويل جوزيه وهما كمان ودوله هدايا الماريوت .. وهما يعلموا الكلام دة تماما ..

ممكن تكون الهدايا دى بصفة ودية مالهاش علاقة بما يكتب ..

بصفة ودية مرة اتنين تلاتة اربعة عشرة .. لكن دة فاضل بس يدوا هدايا لبعض فى عيد الحب كمان .. انا مش عايز اوضح بس مش عايز اقول كمان ارقام بتدفع لكن انا لغاية كلامى دة هما يعلموا تماما كلامى دة .. لكن لو هما بيتحدونى بقى وكتبوا حاجة تانى هضطر اقول بقى ارقام وناس وممكن ادخلكوا فى مكالما تليفونية تسمعوا كمان .. لان انا عايز اقول ونفسى كل اهلاوى يكون سامعنى دلوقتى او بيقرا الحوار يهتم للى انا بقوله دة .. اى حاجة تنتمى لموقع اسمه جماهير الاهلى يعنى النادى الاهلى يعنى مبادىء واخلاق واحترام لما انت بتهاجم كابتن الفرقة اللى هو رمز لناديك وراها ايه .. فى لاعيبة بتسعى عالشارة مش هتاخدها .. انا بريحهم مش هياخدوها لان فى قبلهم اسامى كبيرة تعبت جوا النادى الاهلى .. الحاجة التانية فى موقع يقول على كابتن الفرقة ان هو بيشتم لاعيبته .. محصلتش والناس عارفة قد ايه انا بحب النادى وبحب الجماهير وبحب اللعيبة وبدافع عنهم .. اللعيب الوحيد اللى كان بيطلع يدافع على كل القنوات كنت انا .. فبيقولوا حاجات فعلا لاتعقل يعنى ..

هل حصل ازمه بينك وبين الحارس الهارب ايام وجود فى الاهلى؟

لا بالعكس كان فى ناس ممكن تفتعل حاجات لكن بالعكس انا وعصام بنكلم بعض على طول وعمرنا ما اختلفنا ..

للأسف يا شادى كنت أحب صورتك تفضل جميله قدامنا زى اسلام الشاطر ووائل رياض و غيرهم اللى مشاهم جوزيه و محدش منهم اتكلم كلام فارغ بالشكل ده

ياشباب هو فعلا الكلام دا حصل ؟
لو حصل يبقى شادى كدا بيخسر كل الناس
وعايز يكرهنا فى جوزيه
وبعدين لو هو فعلا بيحب النادى مش هيقول كدا
حد يفهمنى هو فعلا الكلام دا حصل

الكلام حصل يا سوكا و مدحت شلبى اتصل بالبيه على الهوا و أكد انه قال الكلام ده لما مدحت شلبى قاله انا عندى التسجيل بس عمرى ما هاذيعه

المشكله مش كلامه عن جوزيه بس السخيف كلامه عن زمايله

كلامك صح يا حازم
و دى طريقة واحد متخبط و مش عارف هو عايز ايه
طبعاً واحد خرج من جنة الأهلى نادى القرن لنادى من أندية الأقاليم فلازم يقول كدا
و لسة لما هزايم الاتحاد هتزيد و الكلام هيبقى كتير عليه هيقول اكتر لأنه بنى ادم مش سوى

ياما ناس خرجت من الأهلى وفضلت على إحترامها
بيبو ووليد ومحمود صالح وعلاء ميهوب والنحاس وربيع يس وأيمن شوقى وعبد الجليل وغيرهم كتير
لكن المشكلة حاليا فى الإعلام القذر اللى بيفضل يزن على اللعيبة ضعاف النفوس زى حسين على
او ضعاف العقول زى شادى .. ويستدرجهم لغاية مايوقعهم فى الغلط
لمجرد تشويه صورة الأهلى
مشكورة خبيرتنا الجميلة للمتابعة
وربنا يكفينا شر المحسوبين على الأهلى
أما الآخرون فنحن كفيلين بهم

الحديث نازل صوت كمان علي موقع كووره
يعني مايقدرش ينكر حاجه خالص
ورد المايسترو كافي جدا
شكرا لمروركم

بس شادى عمره ما كان كدا
وعلى طول بيتكلم كويس
وعمره ما غلط فى زمايله
ولا قال فى حقهم كلمه وحشه
اكيد فى حاجه اجبرته انه يقول كدا

» فلافيو في حديث مطول : أحد سائقي التاكسي كان من أعز أصدقائي في مصر وجوزيه كأبي
» البدري: سنعطي الفرصة للجميع، ولا حديث عن الصفقات الجديدة الآن
» حديث قدسي تقشعر له الأبدان!!!
» مران الأربعاء : هاتريك الليبيري دي فوركي في شباك أمير حديث الجميع
» الأهلي يؤدي تمريناً قوياً وحماس المحمدي حديث المتابعين