انفراد:شاهد اجتماع مجلس الادارة التاريخي.صوت وصورة..وريحة!!!

انفراد ..شاهد اجتماع مجلس الادارة التاريخي ..صوت وصورة.. وريحة كمان!!!

سيداتي انساتي سادتي
يا كل ام ثكلي .. وكل طفل فقد الأخ والاب
املئوا الارض بترانيم السلام

فلقد اجتمع شمل السادة اشاوس مجلس ادارة الزمالك ليضيفوا الينا المزيد من البهجة والكوميديا السوداء التي ابتلانا الله بهما منذ اربع سنوات وزيادة ولازال العرض مستمرا .

موقعكم الحبيب - يازمالك - ينفرد بنقل صورة حية ( لو كان لسه فيه امل اننا نفضل احياء ) ومن داخل قاعة اجتماعات مجلس الادارة ... المجلس الذي جاء في موعده تماما مع القضاء والقدر .

الكادر - نادي الزمالك - قاعة فخمة للاجتماعات وكراسي جميلة وترابيزة كبيرة -
الزمن ليل داخلي مستمر من اربع سنين

بضعة وجوه من النوع المألوف لا تعرف منها الا وجه واحد للاعب دولي سابق اسمه حازم امام
الباب ينفتح ليطل علينا وجه جديد يقطر عبوسا .... وهو بالمناسبة رئيس بالتعيين علي ما تفرج .

الرئيس المتعين :- ايه يابني منك له جايبيني ليه علي ملا وشي ... انا فاضي لكم انتم والهم بتاعكم ده ؟
احد الاعضاء:- معلش ياباشا عطلناك عن البيزنس بتاعك .. .... بس اعذرنا ده اجتماع تاريخي سعادتك ولازم تحضره ...اجتماع مهم و فيه قرارات مصيرية .

الرئيس المتعين هازئا :- تاريخي ليه .. انتوا هتلاعبوا الاهلي ... ولا مرتضي رفع قضية جديدة علينا؟
عضو تاني ما حدش يعرف اسمه ( ولا حتي باقي الاعضاء):- لا ياباشا فريق الكورة اتغلب بفضيحة قدام الاولمبي .. انت ما عرفتش ؟؟؟؟

الرئيس المتعين :-ايه .... اي والله ... تصدق فعلا شوبير قاللي من يومين علي حاجة زي كده ... ده حتي قاللي ان احنا عندنا اجتماع مصيري يوم الاربعاء ... هو النهاردة ايه؟؟؟
السيد النائب المتعين :- الله ... فعلا ده النهاردة الاربع !!!! يبقي لازم بقي يا جماعة نعمل شوية قرارات مصيرية ... مش كده .؟؟؟
اغلب الاعضاء في نفس واحد:- طبعا طبعا بدون شك ياباشا .

الرئيس المتعين :- طيب كالعادة ... اول حاجة كده بالصلاتو ع النبي ... شيلوا الجهاز الفني بس سيبوا الجدع الخواجة مش عايزين ندفع فلوس جزائية وافلام من دي ... كفاية ولاد النادي بس يتشالوا ... اهم اتعودوا علي البهدلة وقلة القيمة ومالهمش شروط جزائية ... مش كده ؟؟؟.
حازم امام ينطق علي استحياء :- بس يا اونكل الجهاز الفني مالوش ذنب ..مشكلتنا ان المدير الفني علي قده ومشطب تدريب من عشر سنين .. والاهم ان اللاعيبة بتبلطج ومش عاوزاه .. بالمناسبة ده حتي جيمي قاللي ان احنا لازم نغير المدير الفني النهاردة ، يا اما هيروح اللاهلي .
المدير المتعين :- يا حزوم ولا تقلق ... وطمن جيمي كل اللي عاوزه هيكون .... بس واحدة بواحدة .... وهندي له اي مبلغ واي عقد يحتاجه ... الواد عمرو زكي خلاص اهه هيجيب لنا كبشة ملايين ، وهتزهزه مع جيمي و الشلة كلها .... ده يمكن نعمل لجيمي عقده بالاسترليني هو كمان ... ياسلام واحنا عندنا كام جيمي يا حزومة.
حزوم مبتسما :- والله ده العشم برضه يا اونكل .

النائب المتعين :- خلاص ياريس ... يبقي نشيل طقم الفنيين ونجيب طقم تاني ... بس نجيب مين؟... بس ما حدش يقوللي نجيب الجوهري .. بلاش كلام فارغ ... فاروق موجود وجاهز في اي وقت واهو مننا وعلينا برضه .
الريس المتعين :- يا عم لا روقة ولا جوقة ... هنجيب نفس الطقم اللي فات ... هاتوهم تاني ... اهو علي رأي المثل ... اللي تعرفوا احسن ماللي ما تعرفوش .

احد الاعضاء :- طيب اللاعيبة ، مش هنعمل اي حاجة معاهم ؟؟
الريس المتعين :- نعم يالدلعدي ... كله الا اللعيبة يا عمر ... بس لو عاوز تهدي الرآي العام ... قولوا للصحافيين ولاد الـ ( تيييييييييت ) ان احنا هنخصم علي الكباتن مليون جنيه هم الكل علي بعضهم ... عشان ينبسطوا صحافيين اخر زمن دول ؟؟؟؟
حازم ثائرا :- لا يا اونكل ... حرام والله ... مش هينفع .... ازاي تقول كده ؟؟؟؟ لا لا كله الا كده ؟
اونكل الريس المتعين :- اهدا يا زومة ..انت صدقت ؟؟.. ما احنا هنخصم عليهم كده وكده ... وبعدين قولهم ما يقلقوش مع اول فوز في اي ماتش في الدوري او الكاس .. هنبعتر عليهم مليون ولا اتنين مكافاءات اجادة من فلوس الواد عمرو ... طمنهم يا زومة ... والله هتزهزه ... وهندي لكل شلة داخل الفريق حقها وزيادة ... المهم طمن جيمي وابو العلل ورجالتهم .

حزوم يهدأ ويقول مبتسما :- والله يا اونكل انا مش عارف نودي جمايلك الكتير دي فين .
النائب المتعين :- يعني ما فيش اي عقوبة علي اللاعبين ... الجمهور مولع وعاوز قرارات مصيرية ، برضه لازم نعمل حاجة حقيقية نهدي بيها الجماهير المخنوقة .
الريس المتعين :- يعني اعمل لهم ايه الجماهير دي ... ما فيش حاجة بترضيهم ابدا ... مش كفاية عليهم جبت لهم اجوجو وهاني وخلتهم كسبوا انبي 4/1...والاتصالات 2/1 ؟؟؟
بص قول للصحافيين بتوعنا يكتبوا ان رئيس النادي زعق للاعيبة بشدة وقالهم نفر نفر وبالحرف الواحد :- ... يا وحش ... يا وحش ... انا بكرهك ... ما بحبكش .

احد الاعضاء يقول منافقا :- اهو كده ياريس ... وريهم العين الحمرا ...اهو ده الحزم اللي مفتقدينه من زمان .
عضو تاني اكثر نفاقا يعقب عليه :- عقوبات ثورية فعلا ياريس... فعلا منتهي العنف ... اهو كده اللاعيبة دول هيتعلموا الادب .... ويخافوا بقي علي اكل عيشهم .
النائب المتعين :- طبعا يا جماعة ما هو لازم نكون متوازنين بين الشدة واللين ... ومش ننجرف وراء العواطف .... خصوصا ان الماتش الجاي مصيري ... بالمناسبة .... هو الماتش الجاي مع مين ؟؟؟
حازم امام :- مع فريق البدرشين .... يوم الاحد يا دكترة

النائب المتعين :- يبقي لازم نتحد ونرمي خلافاتنا ورا ضهرنا ونهدي الامور عشان اللقاء الهام والصعب ده .مش كده ولا ايه ؟؟؟؟
الريس المتعين وهو يهم بالمغادرة :- خلاص بقي يارجاله مضطر امشي عندي شغل وفلوس وبيزنس .... هاتولي محضر الاجتماع امضي عليه .عشان مستعجل .
الريس يوقع علي محضر الاجتماع بينما يهمهم كاتب الجلسة بصوت خفيض بينما عيناه تدمعان
:-بس كده ياريس ؟؟؟ سبحان الله ... سبحان من يغير ولا يتغير .... حسبنا الله ونعم الوكيل .

الريس المتعين ... يخرج مصحوبا بوداع الاعضاء المتعينين (برضه )... وبعد ان فتح الباب وهم بالمغادرة ... يتذكر امرا ما فيقف ويسأل الحاضرين ... هو الاهلي اخباره ايه اليومين دول ؟؟؟

يتطوع بالرد عليه احد السماسرة ووكلاء اللاعبين الذين حضروا الاجتماع التاريخي السري والمصيري لنادي الزمالك بصفتهم مننا وعلينا وهم السند والمعين للمجلس وكل مجلس :- عندهم ماتش يوم الاحد في نهائي بطولة افريقيا للمرة الرابعة في اربع سنين يا باشا .

الريس المتعين يسرح بفكره قليلا ثم يقول :- مش مهم ...الامل في كاس مصر .

كاتب الجلسة يرد صارخا في الجميع :- او كاس العذاااااااااااااااااااااااااااااااااااااااااااااا اااااب

المقال ده مش من موقع أهلاوى .. أو حتى محايد
صدق أو لا تصدق .. المقال من موقع زملكاوى فعلا إسمه " يا زمالك "
يا خوفى ليكون الزمالكاوية عقلوا

على فكرة يا شريف لولا توضيحك ده انا كنت صدقت انه من موقع اهلاوى
بس حقيقى اللى كاتب الموضوع ده بيفهم و دماغه عالية و جاب كل حاجة على بلاطة
و مشكوووووووووور لتقلك الجميل و الرائع للموضوع يا حبيب قلبى

على فكرة أنا مش مصدق نفسي أثناء قراءة المقال ده ... نادي الزمبلك ده صامد صمود الأبطال !!! ده حاله أفسد و أسوأ من حال مصر كلها .... اللهم شماتة اللهم شماتة اللهم شماتة

Admin كتب:: على فكرة يا شريف لولا توضيحك ده انا كنت صدقت انه من موقع اهلاوى
بس حقيقى اللى كاتب الموضوع ده بيفهم و دماغه عالية و جاب كل حاجة على بلاطة
و مشكوووووووووور لتقلك الجميل و الرائع للموضوع يا حبيب قلبى

أنا خايف بجد لييجى اليوم ويفهموا .. هما كانوا مغيبين وزى الفل
ماتحرمش من ذوقك الجميل يا كبير العيلة
نورتنى بزيارتك الجميلة وردك الأجمل أخى الحبيب الشاذلى

Dr Mourad كتب:: على فكرة أنا مش مصدق نفسي أثناء قراءة المقال ده ... نادي الزمبلك ده صامد صمود الأبطال !!! ده حاله أفسد و أسوأ من حال مصر كلها .... اللهم شماتة اللهم شماتة اللهم شماتة

وعلشان كدة إحنا أهلاوية يا دكتور
لأن الأهلى هو مصر اللى بنتمناها .. مصر اللى بجد .. مش المخطوفة
نورتنى بزيارتك وردك الجميل و"شماتتك اللذيذة" يا حكيم

لا مش معقول يكونوا عقلوا
اطمنوا يا جماعة حتي لو مجموعة منهم عقلت
فباقي القفص البايظ هايفسد التفاحة السليمة ( مع الاعتذار للتفاح طبعا)

مادام بنتكلم عن الفراخ البيضه .. يبقى أكيد قصدك البيض
البيض الفاسد (الممشش) هايفسد السليم طبعا
نورتينى بمرورك الجميل وردك اللذيذ خبيرتنا الجميلة

يا شريف باشا ده من غيظهم وفقعتهم من عمامهم الأهلويه

وكلهم واخدين أقراص منع الفهم وعلى فكره هما غلبوا الاتصالات 4/2 وليس 2/1

على رأيك يا شرقاوى يا أصيل
دول حتى مش عارفين كسبوا كام
شرفتنى بزيارتك وردك السليم أخى الجميل أبو عمر

فعلا عظيم يا اهلي

طول عمره عظيم وبإذن الله أعظم وأعظم
شرفتنى بزيارتك الجميلة يا شعلة النشاط الأهلاوى

» شاهد صور اللقاء التاريخي لفوز مصر الكاسح علي الكاميرون 4-2
» خاص : مجلس الادارة يعتمد اللائحة الجديدة بزيادة مكافآت الفوز
» خاص لـEl-Ahly.com : مجلس الادارة يحفظ هيبته ويرضي جماهيره
» شاهد صورة الكافر الذي سب النبي محمد وصورة الأسد الذي قتله
» مجلس الادارة يقبل اعتذار سمير عبد ربه ويختار رؤوف عبد القادر بدلاً منه