-®( الاهلي يضم واحد من الفراعنه لصفوفه....... !!!! )-

( سبحان الله وبحمده سبحان الله العظيم )
السلام عليكم ورحمة الله وبركاته
[ندعوك للتسجيل في المنتدى أو التعريف بنفسك لمعاينة هذه الصورة]
بيقولوا :
خوفو كان اهلاوي وعلشان كده خد أكبر هرم في العالم ومصر
اما خفرع الأصغر منه شويه كان زملكاوي وعلشان كده خد الهرم اللي بعده علطول
اما منكرع فعلشان كان اتحاداوي اسكندراني فحطوه على بداية طريق مصر اسكندرية الصحراوي
وقدموله الهرم الثالث في مصر
والقصه دي بتبين لنا مدى شعبية الاهلي والزمالك والاتحاد في زمن الفراعنة
علشان كده بنوا ليهم 3 اهرامات وماكنش لسه في انديه تانيه طلعت غير التلاته دول
ولا انبي ولا اسماعيلي ولا حتى طلائع الجيش !
كان يجي الماتش بتاع الاهلي والزمالك وتلاقوا طيبة كلها مش على بعضها
وكل فرعون او فرعونه ينزلوا من على الاهرامات ويطلعوا من التوابيت
ويطلعوا يجروا على السينما الموحده الكبيره ( ماكنش لسه في تليفزيون )
او كانوا بيتفرجوا بالوصله وهما في المعابد بتاعتهم بيشربوا بردي ( شيشه فرعوني )
كان الفراعنه بيحبوا تعليق علاء صادقع ومحمود بكرع وأمون رع ( واحد فرعوني زي تريكه كده )
مره منتخب الفراعنه كان بيلاعب منتخب الهكسوس والدنيا كانت مقلوبه في تصفيات كأس العالم
كانت ساعتها الكوره في العالم في 5 دول بس : الفراعنه ابطال العالم ومنافسهم اللدود الهكسوس
والرومانيين والفرس والعرب
والهكسوس دخلت فينا جون بدري على ارضنا
وفاجأه لاقينا جماهير خوفو ( الاهلي ) بتشتم في شحاتايزييس وبتحدفه بالموز في الملعب
وفاجأه لاقينا جماهير خفرع ( الزمالك ) بيشتموا في حضري أتون وبيحدفوه بالبصل
وملحوظه ان شحاتايزييس كان مساعد المدير الفني أبو الهول
لان ابو الهول هو اللي كان ماسك منتخب الفراعنه ساعتها
وحضري أتون بعد الماتش احترف في الهكسوس بعد تألقه ومات مدفون في تابوت هربان لليونان
واليوم ده في التاريخ اصلا كان سبب الحرب بين الفراعنه والهكسوس
علشان فيه قشرة موزه جات غلط على أفا واحد من مشجعي الهكسوس
وطبعا انتم عارفين أحمس عمل ايه فيهم ( يقال ان تريكه من سلالة أحمس * )
والحمد لله ان الفراعنه قدروا يحولوا الهزيمه الى نصر والجماهير الاهلاويه الزملكاويه
بدل ما ينزلوا يحتفلوا : نزلوا الملعب يضربوا في اللاعيبه وفي بعض
وكان القطرين ساعتها قطر زملكاوي تبع كاكد الكاندور وقطر اهلاوي تبع تريكيكا
قطر الاهلي كان فودافون ومشروبهم البيبسي وقطر الزمالك كان موبينيل ومشروبهم الكوكاكولا
المهم ان البلد كان كلها تعصب للساحرة المستطيلة
وعلشان التعصب ده كان اي لاعب يتنقل من خوفو لخفرع كانوا بيقتلوه ويحطوه في تابوت
والعكس صحيح وعلشان كده لاقينا العديد من المومياوات للفراعنه من عصر خوفو وخفرع
ولكن في نهاية عصر الفراعنه اراد الحاكم ان يقضي على كل ما هو متعصب
فبنى الاهرامات الثلاثه ودفن كل مشجعي الانديه الثلاث في مصر فيها
ومافضلش منهم غير واحد بس كان مسافر وعلشان كده الفراعنه كلهم اسرار ماحدش عارفها
المهم علشان مانخرجش بره الموضوع
ان الواحد المسافر ده الناجي الوحيد منهم التاريخ لم يحدد هويته
فيه برديات بتقول انه كان اهلاوي
وفيه برديات بتأكد انه كان زملكاوي
اما المعابد فكتبت انه كان مالهوش فيها ولكنه لما رجع تعصب من ما حدث للشعب
وقرر ان يشجع الاهلي ومراته أعترضت وطلعت زملكاويه ومن هنا عاد الصراع مره اخرى !
ولكن بفكر حديث ومن ثم بدأ عهد المماليك والتاتار وقطز ومحمد علي
وانتشرت شعبية الاهلي والزمالك اكثر واكثر
حتى وصلنا لعهد السيد الرئيس محمد حسني مبارك موحد القطرين ( الاهلي والزمالك مع بعض في مدينه واحده هي القاهره !! ! )
ويقال في نشرات الاخبار انه اهلاوي وابنه زملكاوي !
وها هو الاهلي الان على مشارف لقاء انيمبا النيجيري في دور الاربعه لدوري الابطال
فتحب تقول ايه لبطل نيجيريا قبل ما يفكر انه يلاعب الاهلي ؟؟؟ [ندعوك للتسجيل في المنتدى أو التعريف بنفسك لمعاينة هذه الصورة]
وأيوه الفراعنه اهلاويه ... .
ولو انت في زمن الفراعنه تحب فريقك يضم مين من الفراعنه ليلعب لأسم ناديك الشهير [ندعوك للتسجيل في المنتدى أو التعريف بنفسك لمعاينة هذه الصورة]؟؟؟

ترقبوا الاجزاء القادمه للاهلي والزمالك مع :
- المماليك
- التاتار وجيلنار
- قريش ... !

هههههههههههههههههههههههههههه جامد جدا

ههههههههههههههههه روعة يا عمرو وفينك كل ده وافتقدناك

عسل يا عمووووور وملهاش حل وبجد وعشتنا والله

جميلة يا عمرو
حمد الله علي السلامة

ملهاش حل
بس ازاى الهكسوس حطوا فينا جون ياريت تشرحلنا الجون دة و راى خبراء الكورة فى العالم عن الجون و خاصة من زاوية علم التشريح و التحنيط
و هل الاشاعة دى صحيحة و ان رئيس الكهنة كان بيحضر عفاريت عشان الزمالك تكسب و الفرعون الكبير مسكة و هو بيحضراراوح فى احد دهاليز الهرم
الكلام دة فى صحيفة اب اخ اوبا تاح رع
معلش هو اسم كبير لكن لصحيفة كبيرة معروفة بحياديتها التامة رئيس تحريرها كان اسمة
عالق اخ حوت صادفسنا و هو الجد الاكبر للناقد علاء صادق

» تاريخ الفراعنه في البطوله الافريقيه
» خاص: ظهور لاعبي الاهلي حصريا علي قناة الاهلي التلفزيونية
» خاص : لجنة الكرة ترفض عرض الترجي بشأن ضم أنيس بوجلبان لصفوفه
» غزه تحطم مراره الحصار في حب الاهلي وتطلق رابطه مشجعي الاهلي في فلسطين
» خاص : الزمالك يعرض على بوجلبان الانضمام لصفوفه مقابل دفع الشرط الجزائي للأهلي !