يا أدامين يا أعضاء عندي فكرة

السلام عليكم وكل عام وانت بخير
بمناسبة قرب انتهاء 2008 وقرب بداية 2009
كلنا بنلاحظ ان في نهاية كل سنة زي اليومين دول بتقوم كل الجرايد والقنوات بعمل استفتاءات هن الافضل والاسوأ علي مدار السنة
ايه رأيكم نعمل حاجة زي كده تتيح لنا كأعضاء في المنتدي اننا نعرف رأي غالبية اعضاء المنتدي في اغلب الحاحاجات اللي بتحصل ونعرف الافضل في كل مجال والاسوأ كمان من وجهة نظر كل واحد
يعني مثلا :

1- أفضل وأسوأ برنامج رياضي علي جميع القنوات والراديو كمان يدخل معانا في كل الاستفتاء علشان اللي بيسمعوه

2- أفضل وأسوأ استديو تحليل للمباريات

3- أفضل وأسوأ اعلامي في مجال الرياضة علي جميع القنوات

4- أفضل وأسوأ لاعب في الأهلي علي مدار العام كله

5- أفضل وأسوأ لاعب في مصر علي مدار العام

6- أفضل وأسوأ رياضي في مصر في لعبة غير الكرة

7- أفضل وأسوأ اصدار صحفي رياضي سواء اسبوعي او يومي أو حتي الصفحات الرياضية في الاصدرات المتنوعة زي الاهرام والاخابر وكده

8- أفضل وأسوأ صحفي رياضي عن كتابته في الصحف مش ظهوره في التليفزيون علشان ما نلخبطش مع رقم 3

9_ أفضل وأسوأ موقع رياضي

10- أفضل وأسوأ معلق مباريات

11- أفضل وأسوأ حدث رياضي علي مدار السنة

12- أفضل وأسوأ شخصية أثرت في الرياضة السنة دي

واسئلة تانية ممكن نزودها
ويكون كل عضو من حقه يحط اختيار واحد او اتنين او تلاته (لكل سؤال) علي الاكتر ويرقمهم
ومثلا الاختيار الاول ياخد 3 درجات والتاني 2 والاخير درجة وهكذا
ممكن مثلا نسيب الاستفتاء ده مفتوح طول الشهر من حق كل عضو يدخل علي مشاركته ويعدل في رأيه لحد اليوم قبل الخير في السنة مثلا ونعلن النتيجة ليلة رأس السنة أو اول ايام السنة الجديدة
ايه رأيكم لو اقتراح بايخ قولوا مش هازعل

فكرة رائعة يا خبيرة
نفذى التوبيك وأنا هاثبته فورا لغاية النتيجة
وممكن يتحط على البوابة كمان بإذن الله بعد موافقة كبير العيلة طبعا

الحمد لله ان الفكرة عجبتك يا مايسترو
مش عارفة ان كانت عجبت حد تاني ولا ايه ؟
طيب انا بيتهيألي انه التوبيك يكون في قسم المقالات ولا شايف حاجة تانية ؟؟؟؟؟؟
وان المشاركين في الاستفتاء هم اللي يكتبوا اختياراتهم بنفسهم
اقصد مش احنا اللي نحطها في شكل اختيارات هم يعلموا قدامها بس
وده علشان يقدروا يكتبوا اكثر من اختاير بترتيب يناسب كل واحد ورأيه
يعني ممكن اتنين يكون لهم نفس الاختيارات لكن بترتيب مختلف
وطبعا كل عضو من حقه ما يجاوبش علي اي سؤال لو مش عايز يعطي رأيه فيه
ويا ريت لو حد عنده اسئلة اكتر يقولها

طبعا الفكره رائعه و كلامك مظبوط جدا فى طريقة تنفيذها و بيتهيألى قسم الدردشه انسب و لا ايه رأيكم

سواء فى قسم الدردشة أو المقالات أو أى قسم
ممكن يتنوه عنه كمان فى توبيك جواه لينك فى كل قسم تانى
علشان نضمن مشاركة الجميع بإذن الله

هيييييييييييييه الزعيم عجبته الفكرة
انا اقترحت قسم المقالات علشان الكل بيدخل عليه وعلي قسم الاخبار
لكن لو شايفين رأي تاني اوكي
وجميلة فكرة اللنك دي يا شريف
شكرا لتشجيعكم
هل من مؤيدين ؟؟؟؟؟؟؟؟؟؟؟
هل من معارضين ؟؟؟؟؟؟؟؟؟؟؟؟
طيب فيه اسئلة تاني ازودها قبل ما التوبيك يتعمل

تمام اوي فعلا

الحمد لله مؤيد كمان
شكرا يا طاطا

يا خبيرة .. إنتى ناوية تعملى الإستفتاء هنا الأول ولا إيه ؟
بالنسبة للأسئلة
أظن ممكن نضيف أفضل وأسوأ مدير فنى .. وأفضل وأسوأ حكم .. وأفضل وأسوأ لاعب عالمى

لا يا مايسترو ما تقلقش
انا ناوية اكتب التوبيك النهاردة ان شاء الله
بس انت متأكد من سؤال افضل حكم ده

ماهو برضه هايبقى من حق الأعضاء حجب اللقب وعدم الإجابة على أسئلة معينة

اه صح والا ممكن نتعرض لمساءلة قانونية

تمام يا رباب
انتي فعلا خبيرة

شكرا يا باشمهندس
في انتظار مشاركتك في الاستفتاء

تم تثبيت التوبيك يا رباب
وتم عمل توبكات دعاية بلينك مباشر بأقسام الأخبار والدردشة
وتثبيت اللينكات فى الأقسام وفى صدارة البوابة
لحين الإنتهاء من الإستفتاء وإعلان النتائج

شكرا يا شريف علي مجهودك وتعبك معايا
وشكرا علي اهتمامك
مايسترو مايسترو يعني
علي حق

rabbit

ده أقل واجب نعمله يا خبيرة
الفكرة رائعة وتستاهل
وأتمنى أعيش وأشوفها تقليد سنوى ثابت بإذن الله

يا رب يا مايسترو
بس الاول ربنا يسهل والموضوع ينجح ويزيد المشاركين فيه شوية
وبعد كام سنه نلاقي مانشيت جرنال مثلا يقول
اللاعب ..... أفضل لاعب في استفتاء منتدي محبي وعشاق الأهلي

بعتذر لتأخرى فى الرد على التوبيك ده
بس حقيقى فكرة هايلة جدا يا رباب
ربنا يقويكى

شكرا يا ريس علي التشجيع
ويا رب الفكرة تنجح
ونجاحها بزيادة عدد اللي هايعطوا صوتهم
ربنا يسهل